Ommaviy oferta — blogerlar uchun

Oxirgi yangilanish: 10-oktabr, 2026-yil

Bu matn namunaviy loyiha va yurist tomonidan ko'rib chiqilishi kerak. / Черновик, требует проверки юристом.

1. Oferta predmeti

Ushbu hujjat O'zbekiston Respublikasi Fuqarolik kodeksining 369-moddasiga muvofiq Zebo (keyingi o'rinlarda — «Zebo») tomonidan blogerlarga beriladigan ommaviy taklif (oferta) hisoblanadi. Zebo blogerga o'z sahifasida hamkor brendlar mahsulotlarini tavsiya qilish uchun platforma (sahifa, do'kon, kabinet, hamkorlik havolalari, statistika) taqdim etadi, bloger esa tavsiyalari orqali amalga oshgan sotuvlardan komissiya oladi.

2. Aksept

Bloger ariza topshirib, «foydalanish shartlari va maxfiylik siyosatiga roziman» belgisini qo'yganda va Zebo arizani tasdiqlab kabinet bergandan keyin birinchi marta kabinetdan foydalanganda oferta to'liq va so'zsiz qabul qilingan (aksept) hisoblanadi.

3. Zebo majburiyatlari

• blogerga sahifa, kabinet va hamkorlik havolalarini taqdim etish;
• bosish va sotuvlarni hisoblash, statistikani kabinetda ko'rsatish;
• brend to'lagan komissiyadan bloger ulushini belgilangan muddatda to'lash;
• blogerning shaxsiy ma'lumotlarini Maxfiylik siyosatiga muvofiq himoya qilish.

4. Bloger majburiyatlari

• faqat o'zi haqiqatan tavsiya qiladigan mahsulotlarni joylashtirish va halol fikr bildirish;
• reklama to'g'risidagi qonunchilikka rioya qilish, hamkorlik mavjudligini auditoriyadan yashirmaslik;
• soxta bosish, o'z-o'ziga buyurtma va komissiyani sun'iy oshirishning boshqa usullaridan foydalanmaslik;
• kabinetga kirish ma'lumotlarini maxfiy saqlash, to'lov uchun to'g'ri karta ma'lumotlarini kiritish;
• Foydalanish shartlaridagi kontent qoidalariga amal qilish.

5. Komissiya va hisob-kitob

Har bir brend o'z komissiya foizini belgilaydi (Zebo bilan kelishilgan holda). Hamkorlik havolasi orqali sotuv amalga oshganda brend komissiya to'laydi; undan blogerning ulushi — 75%, qolgan qismi Zebo xizmati haqi. Har bir mahsulot bo'yicha blogerga tegishli foiz kabinetda ko'rsatiladi.

Sotuv quyidagi holatlarda hisobga olinadi: brend saytidagi kuzatuv kodi qayd etgan xarid, Zebo do'konida yetkazib berilgan buyurtma yoki Zebo administratori qayd etgan sotuv. Sotuv avval «Kutilmoqda» holatida bo'ladi va brendning qaytarish muddati (odatda 14 kun) tugagach «Tasdiqlangan»ga o'tadi. Qaytarilgan yoki bekor qilingan buyurtma bo'yicha komissiya hisoblanmaydi. Sotuvni bekor qilish faqat Zebo administratori tomonidan, asos bilan amalga oshiriladi.

6. To'lov tartibi

• Blogerga to'lov har oyning 15-sanasida, kabinetda ko'rsatilgan bank kartasiga o'tkaziladi.
• Faqat brend Zebo'ga to'lagan sotuvlar bo'yicha komissiya to'lanadi.
• To'lov uchun eng kam summa — 50 000 so'm; kam bo'lsa, keyingi oyga o'tkaziladi.
• Noto'g'ri karta ma'lumoti sababli to'lov o'tmasa, Zebo javobgar emas; ma'lumot tuzatilgach keyingi to'lov kunida o'tkaziladi.

7. Sovg'alar va hamkorlik takliflari

Brend blogerga mahsulotni sovg'a qilib, hamkorlik taklif qilishi mumkin. Taklifni qabul qilish ixtiyoriy. Sovg'a qilingan mahsulot bloger mulkiga o'tadi va qaytarilmaydi; Zebo blogerdan majburiy kontent (Reels, Stories va h.k.) talab qilmaydi. Sovg'a buyurtma hisoblanmaydi va unga komissiya yozilmaydi.

8. Soliqlar

Bloger olgan daromadi bo'yicha soliqlarni O'zbekiston Respublikasi Soliq kodeksiga muvofiq mustaqil to'laydi (masalan, o'zini o'zi band qilgan shaxs yoki yakka tartibdagi tadbirkor sifatida), agar qonunchilikda Zebo soliq agenti sifatida belgilanmagan bo'lsa.

9. Javobgarlik

Zebo brendning to'lovni kechiktirishi yoki to'lamasligi sababli bloger ulushini o'z hisobidan to'lash majburiyatini olmaydi, lekin brenddan undirish choralarini ko'radi. Oferta shartlari, ayniqsa firibgarlikka oid band buzilganda, Zebo shubhali sotuvlar bo'yicha komissiyani to'lamaslik va akkauntni yopish huquqiga ega.

10. Amal qilish muddati va bekor qilish

Oferta aksept qilingan kundan boshlab muddatsiz amal qiladi. Bloger istalgan vaqtda qo'llab-quvvatlash xizmatiga yozib, hamkorlikni to'xtatishi mumkin; bunda tasdiqlangan va brend to'lagan komissiya keyingi to'lov kunida to'lanadi. Zebo oferta shartlarini o'zgartirishi mumkin — kamida 7 kun oldin kabinet yoki Telegram orqali xabar beriladi.

11. Nizolar

Nizolar muzokara yo'li bilan, kelishilmasa O'zbekiston Respublikasi qonunchiligiga muvofiq vakolatli sudda hal qilinadi.

12. Rekvizitlar